.jpg)
kurt marti mit gedicht us «Rosa Loui» ir bärner umgangssprach.
wie geits?
äs chunnt
äs geit
ganz zerscht
chunnt meh
als geit
doch gly
chunnts so
wies geit
und bald
geit meh
als chunnt
bis
alles geit
und nüt me chunnt
anthropomorphi nacht
dr wald lüpft sy hand
es hus sänkt dr blick
dr wäg schteit im fäld
e busch macht dr chopf
es liecht dräjt sech um
em zuun chlopfet ds härz
e ma geit im mond
dr mond geit im ma
es hus lüpft sy hand
dr wald sänkt dr blick
e busch steit im fäld
dr wäg macht dr chopf
e zuun dräjt sech um
em liecht chlopfet ds härz
wätterlag
schitter isch es
bis bewölkt
nach em räge
schynt d’sunne
jitz aber
schneits
es schneit is
uf d’schnöiz
d’coiffeurtarife
si gschtyge
ds barometer
isch gfalle
in island
wird’s schön
löcherbecki
zyt isch nid zahl nid schtrecki
zyt ich es löcherbecki
wo scho nach churzem ufenthalt
dr mönsch z’dürab i d’unzyt fallt
über d’brügge
z’bärn
gits
nid nume d’aare
und
über d’aare
brügge
und über d’brügge
lütt
wo chömen und gönge
z’bärn
gits
lütt
wo über d’brügge gönge
für nümme meh z’cho
wo chiemte mer hi?
wo chiemte mer hi
wenn alli seite
wo chiemte mer hi
und niemer giengti
für einisch z’luege
wohi dass me chiem
we me gieng
sw (gedicht vom kurt marti)
Comments